2011 թ մարտի 11-ին ժամը 16:30-ին անհայտ քաղաքացին ահազանգել է ոստիկանության Շենգավիթի բաժին և հայտնել, որ Բոգրատունյաց պողոտայի 17 շենքի 72 բնակարանում սպանություն է տեղի ունեցել: Այս մասին հայտնել է ֆոտոլրագրող Գագիկ Շամշյանը:

 
Նշված հասցե է մեկնել ոստիկանության Շենգավիթի օպերատիվ-քննչական խումբը Շենգավիթի ոստիկանապետ գնդապետ Լևոն Յազիչյանի և ոսիկանության քննչական գլխավոր վարչության Շենգավիթի քննչական բաժնի պետ Մինաս Հակոբյանի գլխավորությամբ: Արդեն կատարվել է դիակի դատաբժշկական նախնական փորձաքննություն: Դիակը տեղափոխվել է դիահերձարան:
 
[ ?]Ոստիկանության փորձաքրեագետը բնակարանում հայտնաբերել է արյունոտ խոհանոցային դանակ, որն առգրավվել է: Օպերատիվ-քննչական խումբը պարզել է, որ սպանվածը 1988 թ ծնված նշված հասցեի բնակիչ Սարգիս Սեդրակի Գյումիրյանն է: Օպերատիվ-քննչական մարմինը ձեռնարկած օպերատիվ-քննչական աշխատանքների արդյունքում պարզվում է, որ սպանությունը կատարել է սպանվածի հայրը Խորենացի 47 շենքի բնակիչ 1961 թ ծնված Սեդրակ Հովհաննեսի Գյումիրյանը:
 
Ժամը 17:00-ի սահմաններում ոստիկանության Կենտրոնականի բաժնի Մարաշի բաժանմունքի աշխատակիցները բացատրական աշխատանքների արդյունքում կարողացան մեղայականով բաժին հրավիրել սպանությունը կատարած Ս. Գյումիրյանին: Մարաշի բաժնի աշխատակիցների կողմից նա տեղափոխվել է ոստիկանության Շենգավիթի բաժին: Քիչ առաջ Շենգավիթի բաժնի քննչական մարմինը նրան ուղեկցեց սպանության վայր քննչական-փորձարարություն կատարելու:
 
Հարևանները ֆոտոլրագրող Գագիկ Շամշյանին պատմել են, որ սպանված երիտասարդը դեռ ծնված օրվանից տառապում էր անբուժելի հիվանդությամբ և հայրը հաճախ է հարևաններին սրտնեղել, որ չի կարող հոգալ երեխայի առողջական ծախսերը և մի օր հնարավոր է դաժան քայլի գնա, ինչն էլ այսօր կատարել է:
 
Ոստիկանության քննչական գլխավոր վարչության Շենգավիթի քննչական բաժնում քրեական գործ է հարուցվել  ՀՀ Քրեական օրենսգրքի 104-րդ հոդվածի հատկանիշներով: Քննիչի որոշմամբ Ս. Գյումիրյանը ձերբակալվել է:

www.lragir.am