Բրիտանացի իրավաբանները դատական գործ են պատրաստում Բելառուսի նախագահ Ալեքսանդր Լուկաշենկոյի դեմ, որի արդյունքում հնարավոր է՝ նրա ձերբակալության հրաման տրվի մարդու իրավունքների խախտման համար։

H2O Law փաստաբանական ընկերությունը Լուկաշենկոյի դեմ մեղադրանքներ է նախապատրաստում անցյալ տարվա դեկտեմբերի 19-ի նախագահական ընտրություններից հետո մարդու իրավունքների մի շարք խախտումների համար, գրում է BBC-ն։ Ինչպես նշել է անգլիացի փաստաբան Ջեյսոն Մաքքյուն, ինքը Բելառուսում հավաքել է բավականաչափ ապացույցներ՝ Բելառուսի նախագահի ձերբակալության հրամանի համար, որը ուժի մեջ կլինի Բրիտանիայում և թույլ կտա պահանջել հանձնել Լուկաշենկոյին այն դեպքում, եթե վերջինս այցելի այն երկրներ, որոնց հետ Լոնդոնը ունի արտահանձնման մասին համաձայնագիր։

[ ?] H2O Law-ն ներկայացնում է հիմնականում արևմտյան հասարակական գործիչներից բաղկացած Free Belarus Now կոչվող խմբի շահերը, որը պաշտպանում է «Լուկաշենկոյի և նրա վարչակարգի զոհերին»։ Այդպիսով իրավապաշտպանները հույս ունեն ստիպել Լուկաշենկոյին ազատ արձակել ձերբակալված ընդդիմադիրներին։