Երեւանի Կենտրոն եւ Նորք-Մարաշ վարչական
շրջանների ընդհանուր իրավասության դատարանը` դատավոր Էդիկ Ավետիսյանի
գլխավորությամբ, այսօր` մարտի 11-ին քննեց NEWS.am լրատվական-վերլուծական գործակալության դեմ ներկայացված հայցը:
Դատական նիստին չէր ներկայացել հայցվոր կողմի` Արիթմոլոգիական
սրտաբանական կենտրոնի ներկայացուցիչ Մուրադ Ասրյանը, ով, սակայն,
միջնորդել էր հայցը լսել առանց իր մասնակցության: Հայցը, որպես այդպիսին,
այդպես էլ չլսվեց, քանի որ դատավորն ակնհայտորեն որոշել էր իր վրայից գցել
անհեթեթ հայցի քննությունը եւ այն բարդել այլ դատարանի փխրուն ուսերին:
[ ?]Ամեն ինչ սկսվեց նրանից, որ 2010թ. նոյեմբերի 23-ին NEWS.am-ը
հոդված էր հրապարակել Հայաստանի քաղաքացի Հովհաննես Կաթրջյանի մասին:
Վերջինս իր խոսքում մեղադրել էր բժշկական կենտրոնին իրեն խաբելու եւ 10
տարի շահագործման ժամկետով էլեկտրոկարդիոխթանիչի փոխարեն վիրահատությամբ
մեկ այլ, էժանագին սարք տեղադրելու մեջ: Արիթմոլոգիական սրտաբանական
կենտրոնն էլ որոշել էր, թե NEWS.am-ը
լուրջ հարված է հասցրել իր պատվին, արժանապատվությանն ու գործարար
համբավին եւ հայց է ներկայացրել դատարան՝ լրատվամիջոցից 2 միլիոն դրամ
պահանջելով: Հայցը ներկայացվել է իրավաբանական անձ չհանդիսացող կայքի, այլ
ոչ թե հիմնադիր «Մեդիա Կոնսալտ» ՍՊԸ-ի դեմ: Նախորդ դատական նիստում
«Մեդիա-Կոնսալտ» ընկերության ներկայացուցիչներ Արամազդ Կիվիրյանն ու Դիանա
Գրիգորյանը ներկայացրին բացառիկ այդ սխալը, ինչից հետո դատարանը ժամանակ
էր հատկացնել բուժկենտրոնին` հայցը պատշաճ տեսքի բերելու եւ նոր
պատասխանող ընդգրկելու համար: Հայցվոր կողմը մեկ ամիս մտածելուց հետո եկել
էր եզրահանգման, որ անհրաժեշտ է նաեւ փոխել դատարանը, քանի որ
«Մեդիա-Կոնսալտը» գրանցված է քաղաքի այլ վարչական շրջանում:
«Մեդիա-Կոնսալտի» ներկայացուցիչները այսօր կայացած նիստում
քաղաքացիական դատավարության օրենսգրքի դրույթներով հանգամանալից
պարզաբանեցին, որ հայցն ընդդատյա է հենց Կենտրոն եւ Նորք-Մարաշ վարչական
շրջանների ընդհանուր իրավասության դատարանին, սակայն դատավոր Էդիկ
Ավետիսյանը, պարզվեց, մտադիր էր ամեն կերպ գլուխն ազատել գլխացավանքից: Նա
անգամ իր խոսքում բառացի հայտարարեց, թե խախտում է արել` գործը վարույթ
ընդունելով եւ որոշեց բավարարել Արիթմիոլոգիական կենտրոնի միջնորդությունն
ու հայցն ուղարկել Աջափնյակ եւ Դավիթաշեն վարչական շրջանների ընդհանուր
իրավասության դատարան:
Արդեն նիստից հետո NEWS.am-ի թղթակցի
հետ զրույցում փաստաբան Դիանա Գրիգորյանը նկատեց, որ դատավորը պարզապես
գլուխն ազատել է հայցից: «Եթե առաջնորդվենք օրենքով, ապա դատավորն
իրավունք չուներ նման որոշում կայացնել եւ ինքն էր պարտավոր շարունակել
գործի քննությունը: Բայց դատավորը որոշեց այլ քայլի գնալ` ընդհուպ մինչեւ
դատական նիստի ընթացքում արձանագրեց, որ խախտում է թույլ տվել,
հայցադիմումը վարույթ ընդունելով: Գտնում եմ, որ իրականում դատավորը
ցանկություն չուներ գործը քննել եւ որոշումն ուղղակի իր վրայից գործի
քննությունը հանելու միտում էր»,- նշեց փաստաբանը:
Լուսանկարը ` Գագիկ Շամշյանի
www.news.am
